總瀏覽量

2014年8月16日 星期六

只去一次,下不為例的名店:澳洲牛奶公司(外一篇:又戰永合成)




澳洲牛奶公司,余慕名已久。
今於大雨滂沱之際,喜見其招牌閃亮空中(佐敦店)。
即入。
世界開始加速。

當時是晚飯時段,一坐下已中伏,因為澳牛沒有小菜,只有意粉、麵包、蛋、叉燒、意粉、麵包、蛋、叉燒、意粉、麵包、蛋、叉燒......全日都是常餐。
店不大,但竟然站了十幾廿個伙記,一人睇兩三張枱,個個面容優閒但動作神速,果然是「高手在民間」。
門口有一個收銀員,一個負責帶位,廿幾張枱,有帶位員?咪笑呀你,真架。
如此陣勢,當然是速戰格局。

剛坐下就催我食咩,緊張的氣氛令我不敢拖慢節奏,剛落單,伙記即郁,一去一回,「七步上意粉」。
我要反擊,吃了幾口即反催之:吾之奶茶呢?
伙記依然面不改容:即到。
上演一幕「十步上奶茶」。

毫無疑問,澳牛生意興隆,極速開餐制度之下,門口依然出現人龍,出出入入,川流不息。
公道一點,伙記沒有趕人走,但整個格局是會令人吃完就想走的。
食物還可以,但並非吸引,完全是食環境(逼)和名氣(壞),咁都賺到笑?不愧為飲食界奇葩。
再多的劣評也吹佢唔脹。

即使如我,「只去一次,下不為例」,也還有無數人,心嚮往之。


又戰永合成

 

再食上環永合成。
例湯是排骨菜湯(總之好多料,數唔齊),也不錯。但還是遠不及上次飲的豬肚+N種料例湯。


中年以上那個阿姐,形象突出,著短褲,踢拖,頭髮紮夾,見過一次就會記得佢。
呢個阿姐,對客人好客氣,但跟同事傾偈,就咦咦哦哦,有時仲好似嗌交一樣,煩到爆。但記住,佢對客人又好客氣,兩者合併......都係煩到爆。


不過窩蛋牛肉煲仔飯和醬爆雞翼一上,即時原諒一切煩擾。
首次食醬爆雞翼,好味又大隻,連嗰十幾條伴碟的洋葱都令我萌生「一條都不可放過」的念頭。正。

 
 

沒有留言:

張貼留言